Ar ddechrau’r cyfarfod cafwyd gwasanaeth byr dan arweiniad y Trysorydd, y Parchedig Martin Spain, a than Lywyddiaeth Rheinallt Thomas i arwisgo a sefydlu’r Parchedig Dyfrig Rees yn Llywydd Cyngor Eglwysi Rhyddion Cymru. Ar ôl y weddi sefydlu, arwisgwyd ef â gwisg, sgarff a medal. Diolchodd yntau i Rheinallt Thomas am ei eiriau caredig wrth ei gyflwyno ac i’r aelodau am roi eu hymddiriedaeth ynddo fel Llywydd y Cyngor. Dywedodd mai prin iawn ydy’r bobl yn yr oes hon sy’n fodlon gwirfoddoli a derbyn cyfrifoldeb ffurfiol, a’i bod yn un o broblemau ein hoes. Nododd ei bod hi mor bwysig ein bod yn parchu ein gilydd a chlywed neges tystiolaeth Duw. Mae Ei ras ar waith yn ein heglwysi.

Yna, cadeiriodd Dyfrig, y Llywydd newydd, y cyfarfod weddill y bore. Esboniodd ei fod wedi cynrychioli’r Cyngor mewn sawl cyfarfod, gan gynnwys gorseddu Archesgob Cymru, y Gwir Barchedig Cherry Vann. Cawsai hefyd wahoddiad i Gynhadledd Ddiwinyddol Porvoo ddiwedd Hydref oedd yn cael ei chynnal ar ran yr Eglwys yng Nghymru yng Nghaerdydd.

Croesawyd Dr Eryl Wynn Davies i’w gyfarfod cyntaf, a chafwyd adroddiad ganddo ar hyfforddiant a’r datblygiadau sydd ar y gweill o ran yr Is-bwyllgor Hyfforddiant Cydenwadol a’r llall yn Adran Ymgeiswyr a Hyfforddiant Eglwys Bresbyteraidd Cymru.

Adroddodd Dr Cynan Llwyd ar waith Cytûn a’i fod yn gyfnod o wrando ac ymweld a holi i ble mae Duw am eu harwain. Mae’r mudiad yn ecwmenaidd, a nododd dair prif flaenoriaeth ar gyfer ecwmeniaeth yng Nghymru heddiw: a) ecwmeniaeth ymhlith arweinwyr cenedlaethol; b) ecwmeniaeth ym mywyd cyhoeddus Cymru; c) ecwmeniaeth ar lawr gwlad.

Cytunodd Cynan i ddilyn yr awgrym o gyhoeddi datganiad cydenwadol rhwng yr Eglwys Gatholig, yr Eglwys yng Nghymru a Chyngor yr Eglwysi Rhyddion adeg y Nadolig i ddangos y cydweithio sydd rhwng yr enwadau.

Derbyniwyd adroddiad y Trysorydd. Ni chyflwynwyd adroddiad addysg, ond cafwyd adroddiadau gan yr holl enwadau gan gyfeirio at eu cyfarfodydd blynyddol amrywiol.

Terfynwyd y cyfarfod gyda’r Llywydd yn cyhoeddi’r gras. Bydd cyfarfod nesaf y Cyngor ar 13 Mai 2026 yng Ngholeg y Bedyddwyr, Caerdydd, gyda gwasanaeth hybrid Zoom yn cael ei gynnig.