Coleg y Bala
Coleg y Bala yw Canolfan Plant ac Ieuenctid Eglwys Bresbyteraidd Cymru
Mae’r tîm ymroddedig o weithwyr Cristnogol yn trefnu rhaglen lawn hwyl a gweithgareddau i blant, ieuenctid yn eu harddegau a phobl ifanc hyn. Eu nod yw cyflwyno Iesu Grist i’r rheiny sy’n dod yno i aros, a hynny mewn ffordd fywiog a chyfoes.

Mae Gwasanaeth Plant ac Ieuenctid Eglwys Bresbyteraidd Cymru yn trefnu cyfres o benwythnosau ar hyd y flwyddyn yng Ngholeg y Bala. Mae rhestr llawn o’r cyrsiau i’w gweld ar y wefan.

CYFARFODYDD A CHYNADLEDDAU
Mae Coleg y Bala yn ganolfan Gynadledda hyfryd yng nghanol Parc Cenedlaethol Eryri. Mae nifer o ystafelloedd ar gael ar gyfer cynadleddau a chyfarfodydd.

CANOLFAN BRESWYL AR GYFER GRWPIAU
Mae’r Coleg yn darparu llety cysurus ar gyfer teithiau maes ysgolion a Phrif Ysgolion , Undebau Cristnogol a chynulliadau o bob math. Mae’r ystafell chwaraeon a’r cyfleusterau awyr agored yn boblogaidd iawn ymhlith y rheiny sydd ar deithiau addysgol!

CWRS IEUENCTID
Penwythnos i bobl ifanc blynyddoedd 7-11!
Bydd y penwythnos yn llawn gweithgareddau, gemau a digon o amser i ymlacio gyda ffrindiau yn y ‘fifa lounge’ a’r stafell chwaraeon. Bydd rhywbeth i bawb! Fe gawn ni amser gydol y penwythnos i edrych ar y Beibl a chael grwpiau bach i drafod beth i ni wedi dysgu.

Mwy o wybodaeth ar wefan: www.colegybala.org

SOULED OUT
Digwyddiad 5-noson cyffrous i ieuenctid (15+), myfyrwyr ac oedolion ifanc.
Cynhaliwyd Souled Out am y tro cyntaf yn Awst 2000 yng Ngholeg y Bala (Canolfan Plant ac Ieuenctid Eglwys Bresbyteraidd Cymru), gyda’r bwriad i annog ac arfogi cenhedlaeth newydd o bobl ifanc i wasanaethu Eglwys Crist. Mae gwaith Souled Out wedi tyfu ers hynny.

Mae Souled Out wedi datblygu i fod yn rhwydwaith sy’n anelu at ddatblygu disgyblion ac arweinwyr i Gymru a thu hwnt. Mae’r angen sydd yn yr Eglwys am genhedlaeth newydd o ddisgyblion ac arweinwyr Crist-debyg, brwdfrydig a llawn gweledigaeth, yn amlwg.

Bwriad Souled Out yw ceisio ymateb i’r angen hwn trwy gasglu, annog ac arfogi ieuenctid, myfyrwyr ac oedolion ifanc i wneud gwahaniaeth i’r Deyrnas yn eu cenhedlaeth.

Eisoes, gwelwyd pobl ifanc yn dod yn Gristnogion, ac yn mynd ymlaen i ddarganfod cyfleon i wasanaethu Crist.
Ein gweledigaeth yw Cymru dan ddylanwad yr Efengyl, gyda phobl yn dyheu am weld yr Eglwys yn cael ei diwygio yn yr 21ain Ganrif.

Mwy o wybodaeth ar wefan: www.souledoutcymru.net

Coleg Trefeca
Mae Coleg Trefeca yn ganolfan hyfforddiant ar gyfer lleygwyr, ac mae wedi ei lleoli ym Mannau Brycheiniog. Mae Coleg Trefeca yn darparu lle ar gyfer cynadleddau a chyrsiau yn rheolaidd ac mae’n le delfrydol os am weddïo, myfyrio, neu ymlacio.

Coleg Trefeca yw hyfforddiant lleyg, canolfan gynadledda a thŷ encilio Eglwys Bresbyteraidd Cymru. Wedi’i leoli ym Mharc Cenedlaethol hardd Bannau Brycheiniog, mae Trefeca yn le hanesyddol a chysegredig. Roedd Trefeca yn gartref i Howell Harris (1714-1773), arweinydd dylanwadol y Diwygiad Methodistaidd yng Nghymru ac yn gyfoeswr i Fethodistiaid mawr eraill fel Daniel Rowland, William Williams Pantycelyn, George Whitefield a John a Charles Wesley.

Heddiw, mae llawer o bobl o amrywiol draddodiadau Cristnogol yn dod i Trefeca ar gyfer hyfforddiant, cynadleddau, adnewyddiad ysbrydol ac encilio. Yn Nhrefeca, mae’r pwyslais ar letygarwch a chroeso Cristnogol ac i lawer o bobl mae Trefeca yn ‘ychydig bach o’r nefoedd’ lle gall pobl ymgynnull i fod yn dystion ac i addoli. Mae’r ymdeimlad o deulu yn dal yn gryf ac mae’r traddodiad hir o ddysgu Cristnogol yn parhau.

Mwy o wybodaeth o wefan: www.trefeca.org.uk

Gŵyl Coda
Gŵyl dros benwythnos yn Fferm Dol Llys, Llanidloes

Beth yw Coda?
Cymuned ar wasgar: yn uno ein celfyddydau, ffydd, creadigedd a gweithredu ac yn creu gofod ble gallwn ysgogi ein gilydd.

Gŵyl a fydd yn denu ac yn ysbrydoli pobl, eglwysi a chymunedau tuag at ffydd a gweithredu.
Rhwydwaith yn creu ‘pethau bychain’ a fydd yn adlewyrchu ac yn llunio gwyliau Coda i ddwyn pobl ynghyd (yng Ngorffennaf 2018, 2020 a 2022).

Amrywiol, cynhwysol, croesawgar, hael.

Mae’r ŵyl yn fynegiant o rwydwaith o bobl sydd wedi bod yn datblygu dros rai blynyddoedd ac a fydd yn parhau i newid. Mae ein hymrwymiad i gael y math yma o ddigwyddiad bob yn ail flwyddyn yn benderfyniad bwriadol; mae gwyliau yn dwyn llawenydd a gallant fod yn sbardun gwych ond byddai mynd ati i gynnal un yn flynyddol yn eu troi’n ganolbwynt ffocws, yn hytrach nag yn un ffordd o gyfleu a rhoi mynegiant i’n rhwydweithio.

Beth i’w ddisgwyl:
yr un ethos yn arwain
yr un hyblygrwydd i gysylltu gyda beth bynnag sy’n digwydd yng Nghymru a’r byd bryd hynny
yr un ymrwymiad i hygyrchedd i bawb
yr yn dyhead i greu man hwyliog ac ystyrlon i bawb o bob oed.

Gwirfoddolwyr – sylfaen yr ŵyl
Yn llythrennol gwirfoddolwyr yw’r galon sy’n curo i wneud yr ŵyl. Fyddai o ddim yn bosibl hebddynt. Mae rhoi ychydig o oriau i wirfoddoli yn yr ŵyl yn newid y profiad i nifer o bobl. Fe ddysgom y tro diwethaf nad oedd yn bosibl gwneud ambell i beth oeddem wedi eu bwriadu heb fod yn gwbl afresymol yn ein gofynion o’n gwirfoddolwyr. Y gobaith yw y bydd pethau’n wahanol y tro nesaf.

Rhwydwaith ydym ni cyn unrhyw beth arall – ac o’n cysylltiad â’n gilydd y daw yr ŵyl a’n holl weithgareddau. Mae croeso i chi fod yn rhan o’r rhwydwaith ac ymuno fel y mae’n siwtio chi. Os ydych yn gwirfoddoli gyda ni, yn rhoi’n ariannol, yn cyfarwyddo, yn noddi, yn cyfrannu .. neu yn fwy nag un o’r pethau hynny… rydych yn y Criw. Y syniad yw bod pawb sy’n rhan o greu Coda yn gyfwerth. Mae gennym rôl wahanol ond yn cydnabod bod angen pob rhan i wneud y gwaith.

Am fwy o fanylion ewch i: www.coda.cymru

Gŵyl Llanw
Mae Llanw yn ŵyl Gristnogol i bob oed gafodd ei sefydlu yn 2008. Roedd oddeutu 60 o bobl yn yr ŵyl gyntaf ac mae wedi tyfu bellach i fod yn ŵyl mae oddeutu 300 yn ei fwynhau’n flynyddol. Mae’n ŵyl symudol ac wedi ei gynnal yn Llangrannog, Cei Newydd, Dinbych y Pysgod, Cricieth a Chydweli.

Ffocws yr ŵyl yw dathlu’r atgyfodiad wrth i Gristnogion ddod at ei gilydd i glywed pregethau, anerchiadau a seminarau Beiblaidd a mwynhau addoliad egnïol a chyfoes.

Mae darpariaeth lawn ar gyfer plant a phobl ifanc wedi bod yn rhan o’r ŵyl ers y dechrau. Mae hefyd yn ŵyl breswyl gyda’r cyfle i bawb archebu llety ar y cyd, er bod nifer hefyd yn trefnu llety eu hunain ac yn mynychu fel ymwelwyr dyddiol.

Cynhelir yr ŵyl yr wythnos yn dilyn Sul y Pasg bob blwyddyn.

Elusen fach annibynnol (Rhif Elusen: 1166349) sy’n trefnu’r ŵyl heb nawdd na chefnogaeth ffurfiol unrhyw fudiad neu enwad. Cadeirydd presennol yr ŵyl (yn 2020) yw Meirion Morris a’r ysgrifennydd yw Heledd Iago. Mae gweddill y pwyllgor a’r gwirfoddolwyr yn dod o wahanol draddodiadau ac enwadau.
Mwy o wybodaeth o wefan: www.llanw.org

Gwersylloedd arbennig sy’n cynnwys gweithgareddau awyr agored, tripiau i’r traeth ac i lefydd diddorol, chwaraeon a gemau gwirion, nofio, tenis bwrdd a thwrnamentau, crefft ac adloniant o bob math. Mae’n gyfle gwych i fwynhau cwmni hen ffrindiau ac i wneud ffrindiau newydd. Mae’n gyfle da i astudio’r Beibl mewn ffordd y gelli di ei ddeall, ac i ddysgu mwy am Iesu Grist. Bydd y swogs wrthi’n gweithio’n galed i greu awyrgylch llawn hwyl ac i sgwrsio gyda ti am bob math o bethau. Dyna pam bod nifer o wersyllwyr yn dod nôl blwyddyn ar ôl blwyddyn.

Am fwy o wybodaeth: www.mudiad-efengylaidd.org

Yn ein dyddiau ni mae gwyliau yn bwysig ac yn beth i’w drysori. Mae’r gynhadledd hon yn gyfle i gilio oddi wrth brysurdeb bywyd a gwaith, gan ymlacio gyda theulu neu ffrindiau mewn awyrgylch gwahanol. Beth well nac ymuno gyda Christnogion eraill o bob rhan o Gymru am wyliau, cyfle i gymdeithasu ac yn fwy pwysig na dim arall – ceisio’r Arglwydd? Os ydych chi’n dod ar eich pen eich hunan, yn deulu neu’n rhan o grŵp, a beth bynnag yw eich cefndir enwadol neu eglwysig, bydd croeso cynnes i chi yn Aberystwyth! Ymunwch wrth geisio a derbyn gras o gylch y Gair.

Am fwy o wybodaeth: www.mudiad-efengylaidd.org

Mae Saint y Gymuned yn trefnu gwersylloedd Cristnogol cymharol rhad, rhai yn benodol ar gyfer plant a rhai eraill ar gyfer teuluoedd cyfan sy’n cael eu cynnal ar eu safle gwersylla yn Llanddwywe nepell o Harlech.

Mae’r safle ger Harlech, yn agos at y traeth a choetir gwych. Deffrowch i olygfeydd o’r môr ac arogl brecwast, mwynhau diwrnod yn llawn o weithgareddau hwyliog, archwiliwch beth ydi pwrpas ffydd a mynd i’r gwely gyda chymaint o atgofion arbennig.

Mae’r Gwersyll Saint y Gymuned hwn yn cynnwys: Mae’r Gwersyll Saint y Gymuned hwn yn cynnwys rhaglen lawn o weithgareddau, llety cysgu mewn pebyll, cyfleusterau golchi / cawodydd ac mae’n cael ei arlwyo’n llawn.

Am fwy o wybodaeth: www.saintygymuned.org a chwiliwch am “Llanddwywe”